الأربعاء، 8 مايو 2013

انا والمتحرش والجزمة




انهاردة وانا رايحه الشغل وبالظبط عند ميدان  عبد المنعم رياض عند الاشارة  وانا جايه اعدي مرة واحدة لقيت راجل عمرة حوالي 39 :40 سنة وفجاة قرب مني جداً لدرجة اني حسيت بنفسة عند رقبتي وقالي (ايه ال.... الجامد دة ) انا محستش بنفسي غير وانا بضربة بالقلم وبشتم وبزعق  وفي ثانية الاشارة فتحت وهو عادا الطريق وانا مستمرة في الشتيمه وبزعق ومش عرفه اعدي والغريب ان الشارع كله وقف يتفرج مفيش غير سواق تاكس وقفلي ونزل حاول يساعدني وسألني هو سرقك قولتله لا اتحرش بيا وحاولنا نعدي ومعرفناش ، المستفز بقى ان الحيوان دة كان واقف الناحية التاني وقاعد يبعتلي بوس في الهواء ويعملي باي باي   . انا محستش بنفسي غير وانا بقلع الجزمة وبحدفها بكل عزم عندي عليه  وهنا بس الظابط بتاع الاشاره وقف الطريق وقالي عديلوا واول ما الاشاره بدأت تقف  المتحرش طلع يجري  .
 شفت فيهم حاجات كتير كنت عارفها من زمان بس تكرارها تعبني   الموقف كله  خد ثواني بس الثواني دول  
الناس الي بتتمشى في الشارع وشفتني وقاعدت تضحك  *
*العسكري الي اقصى حاجة عملها وقفلى الطريق وقالي عدي (انا لوحدي هعدي علشان الموضوع يكبر بيني وبين المتحرش  والفرجه تبقى امتع
سواق التاكسي الي  لسة جواه شوية انسانية  ومقبلش انه يعدي  ويسب حد بيصرخ  *

*المتحرش ان ازاي المجتمع اقنع الشخص دة ان ليه كامل الحق في انتهاك المرأة وانا دة حقه والجرأة الي وصلها لدرجة انه يقرب اوي كدة  
ياتري في كام بنت هو عمل معاهم كدة ومتكلموش
خوف بقى رهبة مفاجاة  اي سبب من دول ؟

* انا  واحساسي انتي مباحة اوي كدة لاي شخص لمجرد اني امرأة
 ,وعلى الرغم من شغلي في حملات كتير ضد التحرش   وبسمع وبشوف حالات تحرش كتير وانا نفسي كتير بكون المجني عليها  الا ان كل مرة بتكون مؤلمة زي اول مرة
بس انهاردة انا مبسوطة بنفسي اني اخذت حقي 
وعهد مع نفسي اي حد هيحاول يتعدي عليه ملهوش عندي غير الجزمة
 ونفسي كل البنات يعملوا كدة
المتحرش = جزمة




هناك 3 تعليقات: